Таҷлили Рӯзи Модар ва солгарди таъсисёбии «Маркази таълими калонсолони Тоҷикистон»
Бахшида ба Рӯзи Модар ва таҷлили 12-умин солгарди таъсисёбии Муассисаи давлатии «Маркази таълими калонсолони Тоҷикистон» маросими идона баргузор гардид.
Дар маросим директори Марказ Ҷаҳонгир Сафарзода оид ба қадру манзалати зан-модар суханронӣ намуда, бонувони Марказро ба Рӯзи Модар ва тамоми кормандонро ба иди касбияшон табрику таҳният гуфт.
Тазаккур дода шуд, ки зан - модар олиҳаи зиндагӣ, асоси саодатмандиву шукуфоӣ, неруи пешбарандаи ҷомеа дар ҳама давру замон дониста мешавад. Мақому мартабаи зан ва ситоиши ӯ мунтазам мавриди васф қарор гирифта, пеши ӯ бузургони ҷаҳон сари таъзим фуруд овардаанд.
Имрӯзҳо нақши занон дар тамоми самтҳои фаъолияти ҷомеа, пеш аз ҳама, дар сиёсати пешгирифтаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон назаррас аст.
Дар фарҷоми чорабинӣ ба кормандон барои фаъолияти назаррас ва пурсамарашон ифтихорномаҳои соҳавӣ тақдим карда шуданд.